Monday, July 23, 2007

Nĩ Tũthuurane Wega: “Mũndũ Wĩna Rwake……

Mũini Ndemethiũ wa Gatanga na Kariũki wa Kĩarũtara nĩmangenagia mũno na nyĩmbo ciao nĩ ũndũ wa motari mega. Ica ikuhĩ nĩndĩrathomithirio thimo ĩmwe nĩ Ndemethiũ ‘Mũndũ wĩna rwake ahĩtũkaga ngui na itikũge agathiĩ kũrũmwo nĩ ng’ondu’. Ndikwenda kwaria wa ng’ondu cirũmanaga-ĩ itaambĩtie gũkũnyita ũgeni mĩthomi wakwa mwende. Nĩ gatĩĩna wee, rĩrĩa njĩrĩga kwandĩka ngathĩĩti-inĩ ĩno twendete!! Ti ng’ondu yanũmire, aca, no mĩhang’o ya kũgeria kwĩmenya makĩria. Waigua ngĩgweta cia aini, nĩ kũmenya atĩ aya nĩ andũ a bata mũno bũrũri-inĩ, na nĩkĩo rĩrĩa ndĩrathomagĩra ndingirii yakwa ya gatatũ, tũmĩĩtaga PhD, kana warĩkia andũ magagwĩta Ndagĩtarĩ (Dr), ũtuĩria wakwa warĩ ũrĩa aini a nyĩmbo cia Gĩkũyũ matũthomithagia ũndũire, ũteti, hithitũria iitũ, na ũrĩa nyĩmbo ciitũ itũcokanagĩrĩria hamwe andũ a Nyũmba ya Mũmbi hĩndĩ ĩrĩa tũrĩ hatĩka-inĩ kana handũ hairũ. Mũno ndaroraga aini hĩndĩ ya mĩaka mĩritũ tũrĩ wathani-inĩ mũbuthu wa Wagacũgũma. Ngĩandĩka maya moothe mũthoomi mwende nĩndagire kamweke ga kwaria nawe, no nĩ ndehoya kũrĩ we ũngirĩrĩrie. Nĩ ndagwa kĩharo rĩngĩ. ************************************************************************ Mĩaka ĩyo mĩhĩtũku nĩndĩyoneire maingĩ na ngamenya maingĩ ma. Ngũririkanie, ndĩrĩ o Abirika ya Mũhuro, itũũra-inĩ rĩa Johannesburg. Mwaka ũcio ũrathirire ndarĩ gũceera bũrũri wa Brazil, ũrĩa ithuothe tũũĩ nĩ ũndũ wa mũbira wa magũrũ. Athaki njorua ta Pele, kana Ronaldinho wa Barcelona, maũmĩte bũrũri ũyũ. Andũ a Brazil maragia rũthiomi rwa Portuguese, tondũ mũkoroni wao aumĩte Portugal. Nĩ bũrũri ũmwe wĩ andũ athaka mũno, na mũno nĩ marĩ ngoro njega. Nĩ andũ akeni ningĩ. Ũndũ ũngĩ wa kũmenya nĩ atĩ hĩndĩ ya ũkombo mĩaka-inĩ ya 1800, andũ aingĩ a kuuma Africa nĩmendirio kũu nĩ mũthũngũ marutage wĩra mĩgũnda-inĩ ya igwa. Nĩ ndathire taũni ya Pelourinho kũrĩa thoko nene ya ngombo yaarĩ. Aya athũngũ manatuonia maũndũ!! Ũrĩ Brazil, kanitha wa Gatoreki nĩ mũrũmu mũno kũu. Nĩ ndonire kanitha wa makĩria ma mĩaka magana meerĩ wakĩtwo na thahabu. Ũndũ wa kũmakania nĩ atĩ ota bũrũri wa South Africa, no kũrĩ ngucũkanio ya andũ eerũ (athũngũ) na andũ airũ. Ũyũ nĩ ũndũ umwe itendire ona hanini, mũno taũni-inĩ ya Sao Paulo. No mwena wa Salvador kũrĩa ndaikaraga, andũ aingĩ kũu nĩ andũ airũ. Brazil nĩ mathondekaga betũrũ kuuma kũrĩ igwa; hihi Kenya no tũthome o kaũndũ hau? Ngwĩhoka kuma ndacera kũu, timu ya gwitũ Gatũra ya mũbira nomanjĩtĩkĩrie thake ona akorwo nĩ ndagĩka ikũmi. No gũkorwo nĩ ndacamire caai ũrĩa ũtũmaga Ronaldinho athake mũbira wega ũguo, kana atĩa mũrata wakwa wa tene, Wainaina wa Mercy?!!
************************************************************************ Nĩ njĩrĩgĩte ningĩ gũcemania na andĩki njorua a Kenya; Prof Ngũgĩ wa Thiong’o na Prof Ali Mazrui arĩa macerate yunibacĩtĩ ĩno itũ. Arata akwa a Abirika ya Mũhuro matindaga makĩnjũria nĩkĩ bũrũri wao ũtarĩ andĩki me gatũ ta Kenya. Ũngĩcokia kĩũria kĩu atĩa? He macokio, mũthoomi wakwa! ************************************************************************ Nĩ ngaatho kũrĩ Kanjũ ya Naikuru nĩ ũndũ wa gũtĩtĩrithia waatho wa ũgucia wa thigara mũingĩ-inĩ. Nairobi na Mambatha onao nĩ makinyũkĩtie ikinya rĩu. Rĩmwe nĩ ngiraga ngeciria andũ manyuaga thigara nĩkĩ. Ndeyũririe kĩũria kĩũ mĩeri mũgwanja mĩthiru na rĩrĩa ndagire macokio, ngĩhĩta kaimana ndikagucia thigara rĩngĩ! Rĩu ndĩ mũhari wa mbeere kũnyita thirikari mbaru, na rĩngĩ gũkũmithia mũtugo ũyũ mũũru mũno wa kũnywa thigara. Rekei tũhihie rĩera rĩtheru; tũkũgwitĩra mĩrimũ mĩingĩ biũ. Tũririkane atĩ mĩĩrĩ iitũ nĩ hekarũ ya Ngai. ************************************************************************ Mũthoomi mwende, njikarĩte thĩ hakuhĩ na kompiuta yakwa ngĩthikĩrĩria Kameme Kayũ ka Mũingĩ. Ndĩ mairũ ta ngiri ithatũ kuuma Kenya. No rwĩmbo ndĩrariĩ kuuma kwĩ Evans Wanyoike wa Kameme. Ndakorwo oro hĩndĩ ndarĩkia gũthoma ngathĩti ya Nation, kũgerera rũrenda rwa thĩ. Nĩrĩo na kĩngenũ twĩtaga Internet. Kahinda gatarĩ kũraihu, nĩ ngwĩkora tũkĩaria na mũrũ wa maitũ Machĩra ũrĩa nĩ mwandĩki wa Mwĩhoko, kũhĩtũkĩra mũtambo wa Yahoo Messenger initaneti-inĩ! Ndaikaranga hanini nyambie gũthikĩrĩria Ndemethiũ na Karĩũki, njĩkarĩte oro haha. Ũthii ũyũ wana mbere nĩ ũtũmĩte thĩ yoothe ĩtuĩke ta gĩchagi kĩmwe. Ngũrie mũthoomi, hihi nĩ ũtũire ũtũmaga marua na mbahaca na gũcũna thitembũ? Eee onawe, wĩcanũre, nĩ harĩ thikũ ici kĩndũ gĩtagwo email, kana marũa ma rũhuho, oro mũndũ woothe rĩũ, no mũhaka agĩe na anderethi ya marũa ma rũhuho, ota ũrĩa ithuothe tũrĩ kamũngũrio!!! Nĩ ngwĩhoka kahinda gatarĩ kũraihu nĩ ngũhota gũthooma ngathĩti yakwa ya Mwĩhoko, mũtambo-inĩ wa Internet, kana atĩa Mwandĩki Mũnene? *********************************************************************** Mwaka ũyũ tũrĩ na Gĩthuurano kĩnene, thutha wa kahinda ka mĩaka ĩtano. Hĩndĩ ciothe ndainũka Kenya nĩ nyonaga ũgarũrũku makĩria. Ndĩrerirwo ni Maitũ atĩ rĩu ingĩenda gũcerera tata Cecilia wa mũrĩmo ũcio ũngĩ wa rũũĩ rwa Kĩama, gwĩtagwo Mĩĩcũũni, no ninge na ngaari. Tene twathiaga magũrũ. Bara ya gũthiĩ Thĩka kuma Gatũra nĩ nyweeeee, Gĩteme nĩ kũrekĩrirwo thitima, na mangĩ maingĩ. Ndĩraria tu cia Gatũra. Ona matũũra mangĩ kwĩna ũthii wa na mbeere tũtarĩ tuona ũtongoria wana hau kabeere. Angĩkorwo ndorio, nĩtũhe wa Kibaki mĩaka ĩngĩ ĩtano. No rĩrĩ kuura yakwa no ĩmwe, na keerĩ, kuura nĩ hitho yaku. Rekei Gĩthuurano gĩĩkĩ gĩtigatuĩke ‘gĩthũũrano’. Tũtigetĩkĩrie atongoria a gũtũgayũkania; ndikũmagweta!! No rĩĩrĩ, githĩ Ndemethiũ ndaratũririkania, atĩ ‘mũndũ wĩna rwake ahĩtũkaga ngui na itikũge agathiĩ kũrũmwo nĩ ng’ondu’. Warũmwo nĩ ng’ondu nĩhaku!! Nĩ ngaatho nĩ gũthikĩrĩa. Twarie rĩngĩ mweri mũũku.

7 comments:

Ijeoma Uche-Okeke said...

Maina, my goodness!!
This is very interesting to me giving that I can't write in my language fluently like you appear to have done. But what are you saying? I'd really like you to translate.

Anonymous said...

I'm sooooooooooo impressed!My kikuyu has never been that fluent, n your english is superb.By the way in your kikuyu blog...Marutaga beturu igwaini atia???

Kahiro said...

Mundu wa nyumba, wandirikania hindi twandikaga ngathiti yetagwo Mwihoko yaari ya kanitha wa gatoreki wa Muranga.

Anjia Ngathiti ingi na tumihurire irebe biu tondu ruru ni ruthiomi ruitu

Anonymous said...
This comment has been removed by a blog administrator.
Anonymous said...

I read this forum since 2 weeks and now i have decided to register to share with you my ideas. [url=http://inglourious-seo.com]:)[/url]

Anonymous said...
This comment has been removed by a blog administrator.
Anonymous said...

hi, good site very much appreciatted